(რეზონანსი) საქართველოს ტერიტორიაზე არსებულ კომპიუტერებში ინსტალირებული პროგრამების 81% არალეგალურია. ამის შესახებ BSA Global Software Survey-ის კვლევაშია ნათქვამი.

კვლევის მიხედვით, საქართველოში არალიცენზირებული პროგრამების რაოდენობა 2015 წლიდან 3%-ით შემცირდა.

გარდა ამისა, კვლევაში მოყვანილია ციფრები, თუ რამდენია დახარჯული 110 ქვეყანაში „პირატულ" პროგრამებზე. აღნიშნულია, რომ საქართველოში 2017 წელს $22 მლნ-ის არალიცენზირებული პროგრამა აიტვირთა.

ცენტრალური და აღმოსავლეთ ევროპის რეგიონში საქართველო „არალიცენზირებულთა" რეიტინგში მეოთხე ადგილს იკავებს.

პირველ ადგილზე 85%-ით სომხეთია, შემდეგ მოდის 83%-ით მოლდოვა, ბელარუსი - 82%-ით, 81%-ს აზერბაიჯანი და საქართველო ინაწილებენ, ხოლო უკრაინაში ეს მაჩვენებელი 80%-ია.

ცენტრალურ და აღმოსავლეთ ევროპაში ჯამში არალიცენზირებული პროგრამების 57%-ია.

ანალოგიური მაჩვენებელია აზიაში, ლათინურ ამერიკაში, აფრიკასა და შუა აღმოსავლეთში.

ყველაზე დაბალი მაჩვენებელია ჩრდილოეთ ამერიკის ქვეყნებში - 16% და დასავლეთ ევროპაში - 26%.

კვლევაში აღნიშნულია, რომ არალიცენზირებული პროგრამების გამოყენება კიბერშეტევების რისკს ზრდის და ფინანსურ დანაკარგს იწვევს.

არალიცენზირებული პროგრამების დავირუსება მსოფლიოში კომპანიებს წელიწადში 359 მილიარდი დოლარი უჯდებათ.