პარლამენტის შენობასთან, სადაც შვილმკვდარი მამების ზაზა სარალიძისა და მალხაზ მაჩალიკაშვილის აქცია მიმდინარეობს, ჟურნალისტ ლაშა ბერულავას და პოლიციის წარმომადგენლებს შორის შელაპარაკება მოხდა. ლაშა ბერულავას განმარტებით, თბილისის პოლიციის დეპარტამენტის უფროსმა მას არ მისცა შესაძლებლობა, რამდენიმე სლაიდისგან შემდგარი ფოტო და ვიდეო მასალა ეჩვენებინა, რომელიც ოკუპაციის თემას ასახავს.

„აქციაზე სიტყვით გამოსვლისას ვაპირებდი ოკუპაციის პრობლემაზე მესაუბრა და შიდა ქართლში არსებული მდგომარეობის ამსახველი ფოტო და ვიდეო მასალა მეჩვენებინა. მე იმ ნაბიჯებზე წავედი, რომ მასალა სამართალდამცავებს წინასწარ ვაჩვენე, ვუთხარი, რის ჩვენებასაც ვაპირებდი. ამის მიუხედავად თბილისის პოლიციის დეპარტამენტის უფროსმა ლეპტოპისა და სხვა მოწყობილობის შეტანის შესაძლებლობა არ მომცა“, - განუცხადა ჟურნალისტებს ლაშა ბერულავამ.