(რეზონანსი) ტყიბულში მომხდარი საზარელი ავარიის შედეგად დაშავებულთა ნაწილი საავადმყოფოდან გაწერეს. კვლავ მძიმეა 2 დაშავებულის მდგომარეობა, რომელთაგან ერთი ქუთაისის საავადმყოფოში გადაიყვანეს, ხოლო მეორე ტყიბულის ჰოსპიტალში რჩება.

სიკვდილს სასწაულებრივად გადაურჩა 5 წლის ბავშვი, რომელიც ავტომობილის ქვეშ მოჰყვა.

"უცებ მანქანა ჯებირს შეასკდა, მხოლოდ 5 წლის ბავშვის საშინელი ტირილის ხმა ისმოდა, რომელიც მანქანის ქვეშ იყო მოყოლილი მთლიანად სისხლში იყო გასვრილი, ძლივს გამოიყვანეს" - აცხადებს ერთ-ერთი დაშავებული "ნიუპოსთან" საუბარში.

გუშინ მომხდარი ავარიის შედეგად დაიღუპა ერთი ადამიანი. წინასწარი ინფორმაციით, მიკროავტობუსის მძღოლი არაფხიზელ მდგომარეობაში იყო, რომელმაც საჭე ვერ დაიმორჩილა და ჯებირს შეასკდა.