სახელისუფლებო პარტია „ქართული ოცნების“ თავმჯდომარის ბიძინა ივანიშვილის მიერ დაფუძნებული თანაინვესტირების ფონდის თავისუფლების მოედანზე მშენებარე მრავალფუნქციურ კომპლექსში ფართების გაყიდვა უკვე დაიწყო. ამის შესახებ ინფორმაცია უძრავის ქონების ყიდვა-გაყიდვის ცნობილ ვებ-გვერდ myhome.ge-ზ არის განთავსებული.  სარეკლამო ტექსტი 29 აგვისტოთი თარიღდება.

„იყიდება 550 კვ/მ კომერციული ფართი 6-მეტრიანი ჭერით, 300 კვ/მ ანტრესოლის მოწყობის პერსპექტივით, პრემიუმ კლასის მრავალფუნქციურ შენობასი თავისუფლების მოედანზე. ფასი 6 500 000$ + დღგ. ფართი ჩაგბარდებათ თეთრი კარკასის მდგომარეობით 2018 წლის სექტემბრისთვის“, - აღნიშნულია განცხადებაში.

"ბიზნეს მედია" ვებ-გვერდზე მითითებულ ნომერზე დარეკა და ქ-ნ მარიკას ესაუბრა, რომელიც უძრავი ქონების სააგენტო „ახალი სახლის“ (მისამართი: ხილიანის 4) აგენტად გაგვეცნო. მისი თქმით, სარეკლამო განცხადება მათმა სააგენტომ განათავსა და ამ ეტაპზე მხოლოდ ამ ფართს ყიდიან.

ანალოგიური ინფორმაცია მოგვაწოდა ქ-მა დალიმაც, რომელმაც თავი  ასევე "ახალი სახლის" აგენტად წარმოგვიდგინა.

ინფორმაციის გადამოწმების მიზნით, bm.ge თანაინვესტირების ფონდსაც დაუკავშირდა, სადაც განმარტეს, რომ აღნიშნული ფართები ფონდის საკუთრება არაა და შესაბამისად, ფართს ისინი არ ყიდიან.