ზაზა სარალიძემ და მალხაზ მაჩალიკაშვილმა მთელი ღამე პარლამენტის შენობასთან გაათენეს და ამ დრომდე რუსთაველის გამზირზე იმყოფებიან. აქციაზე გამოსვლები კი დღეს საღამოს 19:00 საათიდან განახლდება.  სარალიძემ მაჩალიკაშვილთან ერთად ხელისუფლებას გადადგომისა და ვადამდელ საპარლამენტო არჩევნებზე მუშაობის დასაწყებად 24-საათიანი ვადა მისცა.

„არც ცნობს როგორც ხედავთ მმართველი გუნდის წარმომადგენლები ამ დასკვნას და უწოდებენ პოლიტიკურად ანგაჟირებულს. თავად არიან პოლიტიკურად ანგაჟირებულები, თავად არიან მკვლელების დამცველები და თავად არიან ამ საქმის გამყალბებლების დამცველები. აქედან გამომდინარე, მიიღეთ გადაწყვეტილება, რომ აუცილებლად უნდა დატოვოს ამ ხელისუფლებამ დაკავებული თანამდებობა. მანამ გავაგრძელებ შიმშილობას, მანამ ჩვენი მოთხოვნები არ შესრულდება. აქედან ან მკვდარს გაგვიტანენ ან აუცილებლად მივაღწევთ ჭეშმარიტებას“, - განაცხადა სარალიძემ.

რუსთაველის გამზირზე იმყოფებოდნენ პანკისიდან ჩამოსული ქისტებიც.