(რეზონანსი) ფუნიკულიორის ფერდობზე შესაძლოა, წარწერა - თბილისი განთავსდეს. ამის შესახებ დედაქალაქის მერმა, კახა კალაძემ მთავრობის დღევანდელ სხდომაზე განაცხადა.

მისი თქმით, აღნიშნული ინიციატივა მერიამ პროექტის - „შენი იდეა ქალაქის მერის" ფარგლებში მიიღო.

„ჩვენი თანამოქალაქე გვთავაზობს ფუნიკულიორის ფერდობზე განთავსდეს წარწერა „თბილისი", ქართული და ინგლისური ასოებით. ჩვენი ქალაქის მიმზიდველ ფონზე წარწერა - თბილისი იქნება თვალშისაცემი და ტურისტთა ყურადღებას მიიქცევს", - განაცხადა კახა კალაძემ.

მისი თქმით, აღნიშნული საკითხი ჯერ მერიასთან არსებულ ისტორიულ-კულტურული მემკვიდრეობის საბჭოზე განიხილება, ვინაიდან მთაწმინდის მთა ისტორიულ-კულტურულ ზონაში მდებარეობს და გადაწყვეტილება ამის შემდეგ მიიღება.