ბუქარესტში ანტისამთავრობო მანიფესტაციაზე სამართალდამცველებსა და აქციის მონაწილეებს შორის შეტაკების შედეგად 500-მდე ადამიანი დაშავდა, მათ შორის 25 ჟანდარმი. როგორც საინფორმაციო სააგენტო Agerpres იუწყება, 65 ადამიანი საავადმყოფოებში გადაიყვანეს.

ანტისამთავრობო საპროტესტო აქციის ინიციატორები საზღვარგარეთ მცხოვრები რუმინელები იყვნენ. ისინი მემარცხენე ცენტრისტული მთავრობის გადადგომასა და ვადამდელი არჩევნების დანიშვნას ითხოვენ.

რუმინეთის პრეზიდენტმა კლაუს იოჰანისმა დაგმო აქციის მონაწილეების დარბევა. „ნებისმიერ ადამიანს აქვს უფლება პროტესტი გამოხატოს, ხოლო ძალადობის გამოყენება, მიუხედავად პოლიტიკური პოზიციებისა, დაუშვებელია. მტკიცედ ვგმობ ჟანდარმერიის სასტიკ ჩარევას“, - განაცხადა რუმინეთის პრეზიდენტმა.