(რეზონანსი) შსს-მ ხორავას ქუჩაზე, მომხდარ დაპირისპირებაზე, რომელიც მსხვერპლით დასრულდა, გამოძიება დაიწყო. ამის შესახებ უწყება განცხადებას ავრცელებს.

‘შინაგან საქმეთა სამინისტროს გადაუდებელი დახმარების ოპერატიული მართვის ცენტრ „112"-ში მიმდინარე წლის 1 დეკემბერს, 14:10 საათზე შევიდა შეტყობინება, რომ თბილისში, ხორავას ქუჩაზე, არასრულწლოვნებს შორის ჩხუბი მოხდა.

„მიღებულ შეტყობინებაზე პოლიციამ მყისიერი რეაგირება მოახდინა. შემთხვევის ადგილზე სამართალდამცველები და სასწრაფო სამედიცინო დახმარების ბრიგადა ოპერატიულად მივიდნენ. წინასწარი ინფორმაციით, ურთიერთშელაპარაკებისას, ცივი იარაღით დაჭრეს ორი არასრულწლოვანი, რომელთაგან ერთი - საავადმყოფოშია გადაყვანილი, ხოლო მეორე - მიყენებული ჭრილობის შედეგად, საავადმყოფოში მიყვანამდე, გზაში გარდაიცვალა.

„მომხდარ ფაქტთან დაკავშირებით გამოძიება თბილისის პოლიციის დეპარტამენტმა საქართველოს სსკ-ს 108-ე მუხლით (განზრახ მკვლელობა) დაიწყო. შემთხვევის ადგილზე მიმდინარეობს საგამოძიებო მოქმედებები", - წერია უწყების განცხადებაში.

ახალგაზრდებს შორის დაპირისპოირება ცოტა ხნის წინ მოხდა.

თვითმხილველების ინფორმაციით, დაპირისპირებაში, რომელსაც შემდეგ დაჭრა უძღოდა, საკმაოდ ბევრი ახალგაზრდა მონაწილეობდა.