(რეზონანსი) აჭარაში სტიქიას ებრძვიან. მეწყრული კერები ქობულეთის რაიონის რამდენიმე სოფელში განვითარდა. ყველაზე მძიმე მდგომარეობა სოფელ ქობულეთსა და ზედა სამებაში იყო. ჩაიხერგა შიდა სასოფლო გზები. სოფელ ქობულეთში 70-მდე ოჯახი გარესამყაროსაა მოწყვეტილი.

რამდენიმე სოფლიდან საჭირო გახდა მოსახლეობის ევაკუაცია. 11 ოჯახს საცხოვრებლის დაკარგვის საფრთხე შეექმნა. გვიან ღამით საკუთარი სახლი სულ ექვსმა ოჯახმა დატოვა. ამ დრომდე ელექტროენერგიის გარეშეა დარჩენილი 1500-მდე აბონენტი.

მეწყერი ქობულეთში გვიან ღამით მოსული ძლიერი წვიმის შედეგად გააქტიურდა. სტიქიის სალიკვიდაციო სამუშაოებთან დაკავშირებით საგანგებო შტაბი მუშაობს.