საუკუნეების განმავლობაში მეცნიერებს მიაჩნდათ, რომ დედამიწის ბუნებრივი თანამგზავრი აბსოლუტურად მშრალი იყო. ეგონათ, რომ მტვრით დაფარულ ამ რუხ სხეულს წყლის მოლეკულების შენარჩუნებისთვის საკმარისი გრავიტაცია არ გააჩნდა. უკანასკნელმა კვლევამ კი საპირისპირო აჩვენა და მთვარეზე წყლის რამდენიმე ტიპის არსებობა დაადასტურა. ეს მოულოდნელი აღმოჩენა თავდაყირა აყენებს მეცნიერების წარმოდგენას დედამიწის კომპანიონზე, იცვლება შეხედულებები მთვარის წარმოქმნისა და მისი აღნაგობის შესახებ. კვლევის შედეგები ასტრონომებს შემდგომი მისიებისთვის მნიშვნელოვან ინფორმაციას აწვდის. ამას გარდა, მეცნიერები არც იმას გამორიცხავენ, რომ ჩვენი პლანეტის ბუნებრივ თანამგზავრზე აღმოჩენილი წყალი ოდესმე დედამიწის რესურსად იქცევა.