(რეზონანსი) ფინანსურმა პოლიციამ საქართველოს საბაჟო საზღვარზე, საქონლის გადაადგილებასთან დაკავშირებული წესის დარღვევის ფაქტზე, აზერბაიჯანის მოქალაქე დააკავა.

გამოძიებით დადგინდა, რომ დაკავებული პირი „წითელი ხიდის" გავლით, საბაჟო კონტროლისგან მალულად, განსაკუთრებით დიდი ოდენობით ძვირფასი ლითონისაგან დამზადებული საიუველირო ნაკეთობების გადატანას ცდილობდა.

ავტომანქანაში მოწყობილი სამალავებიდან სულ 2,5 კგ ოქროს ნაკეთობები ამოიღეს. მათი საერთო საბაჟო ღირებულება 148 000 ლარია.

საქმეზე გამოძიება საქართველოს სისხლის სამართლის კოდექსის 214-ე მუხლის მეორე ნაწილით მიმდინარეობს, რაც სასჯელის სახით თავისუფლების აღკვეთას 5-დან 7 წლამდე ვადით ითვალისწინებს.