(რეზონანსი) საზოგადოებრივი მაუწყებლის სამეურვეო საბჭოს წევრის შესარჩევად გამოცხადებულ ღია კონკურსზე განაცხადი 7 მსურველმა შეიტანა.

სამეურვეო საბჭოს კანდიდატები არიან: დავით ცინცაძე - კინორეჟისორი, გიორგი იაკობაშვილი - ბიზნესინჟინერი, საერთაშორისო ეკონომიკური ურთიერთობების სპეციალისტი, აკაკი გიგინეიშვილი - იურისტი, საერთაშორისო კერძო სამართლის სპეციალისტი; ია მამალაძე - ჟურნალისტი; მიხეილ მრევლიშვილი - ტელევიზიისა და კინოს რეჟისორი; ლელა ფირალიშვილი - ფიზიკოსი, ფილოსოფიურ მეცნიერებათა კანდიდატი; პაატა სურგულაძე - აღმოსავლეთმცოდნე, მახლობელი აღმოსავლეთის ისტორიის კათედრის ასპირანტი.

მეურვეობის კანდიდატთა წარდგენის თაობაზე განაცხადების მიღების ვადა 13 ივნისს ამოიწურა.

საკონკურსო კომისიას მოსწავლე-ახალგაზრდობის ეროვნული სასახლის დირექტორი თინათინ რუხაძე ხელმძღვანელობს. კომისიამ ვაკანტურ თანამდებობაზე პარლამენტს სამი კანდიდატი უნდა წარუდგინოს, საიდანაც ერთი პარლამენტის წევრთა ხმათა უმრავლესობით დამტკიცდება.