(რეზონანსი) საავტომობილო გზების დეპარტამენტის ცნობით, ფშაველი-აბანო-ომალოს გზაზე ჩამოსული მეწყერისგან გზა სრულად გაწმენდილია და საავტომობილო მიმოსვლა აღდგა.

ამ დროისათვის დამატებითი გზის გაწმენდით სამუშაოები გრძელდება. მობილიზებულია როგორც მძიმე ტექნიკა ასევე მთასვლელები რათა სრულად მოხდეს არსებული გზის მოწესრიგება, წყლის დონის დაწევა, ვაკისის ფერდის დაწევა და კლდოვანი მასებისაგან ფერდების ჩამოსუფთავება.

6 ივნისს, მეწყრის შედეგად ჩაკეტილი თუშეთის გზის გასახსნელად დაგუბებული ტბა ააფეთქეს. გაწმენდითი სამუშაოების დროს კი შპს ,,გერალის" თანამშრომელი, 52 წლის კაცის სიცოცხლე ემსხვერპლა. ის ზვავში მოყვა და ადგილზე გარდაიცვალა.