(რეზონანსი)კრიმინალურმა პოლიციამ გამოძალვისა და თავისუფლების უკანონო აღკვეთის ბრალდებით 4 პირი დააკავა. გამოძიებამ დაადგინა, რომ დაკავებულები ერთ-ერთ ბიზნესმენს 150 000 აშშ დოლარს სძალავდნენ და თავისი კუთვნილი 200 კვ.მ ფართის მათზე გადაფორმებას სთხოვდნენ.

შსს-ს ინფორმაციით, ბრალდებულებმა ბიზნესმენი გაიტაცეს, ფიზიკური ანგარიშსწორებით დაემუქრნენ და თანხის გადახდის პირობის სანაცვლოდ გაათავისუფლეს. გამოძიება გამოძალვის და თავისუფლების უკანონო აღკვეთის ფაქტზე მიმდინარეობს.

„რუსთავი 2"-ის ინფორმაციით,ბიზნესმენი,რომელსაც ფიზიკური ანგარიშსწორების მუქარით კონკრეტულ თანხას სძალავდნენ, სამშენებლო კომპანია „სვეტის" დამფუძნებელი, გივი ჯიბლაძე იყო.

გივი ჯიბლაძის თქმით, ის სახლიდან გამოსვლის დროს გაიტაცეს. ბიზნესმენი ამბობს, რომ 4 გამტაცებელი მიკროავტობუსით გადაადგილდებოდა, მათ თავზე ტომარა ჩამოაცვეს და ერთ-ერთ ავტოსადგომზე გადაიყვანეს.სავარაუდო გამტაცებლები სამართალდამცველებმა სპეცოპერაციის შედეგად დღეს დააკავეს.