(რეზონანსი) მსოფლიო ჩემპიონი, ავთანდილ ხურციძე „Facebook"-ის საკუთარ გვერდზე მისი დაკავების შესახებ გავრცელებულ ინფორმაციას ეხმაურება. ხურციძე მომხდარს გაუგებრობას უწოდებს.

„გუშინ გავემგზავრე ამერიკაში, რათა დამეწყო მომზადება 8 ივლისის ბრძოლისთვის. ნიუ-იორკში ჩასვლისთანავე მოხდა ძალიან სერიოზული გაუგებრობა. იმედი მაქვს უახლოეს საათებში ყველაფერი გაირკვევა და ისევ მომეცემა საშუალება, განვაგრძო მომზადება სანდერსთან ბრძოლისათვის" , - წერს სპორტსმენი სოციალურ ქსელში.

ნიუ-იორკში 15 ქართველი დააკავეს, რომლებსაც ბრალი რუსული კრიმინალური სინდიკატის წევრობაში ედებათ. პროკურატურა მათ ქურდობაში, რეკეტში, მკვლელობაში, ნარკოტიკებით უკანონო ვაჭრობასა და იარაღის უკანონოდ ტარებაში ადანაშაულებს.

ქართველ სპორტსმენთა ნაწილი აშშ-ში ავთანდილ ხურციძისა და ლევან მაყაშვილის დაკავების ფაქტს ადასტურებს. „დაკავებულები ნამდვილად ავთანდილ ხურციძე და ლევან მაყაშვილი არიან, თუმცა ისინი გაუგებრობაში მოყვნენ" , - აცხადებენ სპორტსმენები.

ამერიკის პროკურატურის ინფორმაციით, დაკავებული ავთანდილ ხურციძე და ლევან მაყაშვილი ბრუკლინში ცხოვრობდნენ და მათ ბრალად თაღლითურ შეთანხმებებში მონაწილეობა ედებათ.