იმერეთის ვიცეგუბერნატორ სოსო ხახალეიშვილის განცხადებით, პირველადი მონაცემებით, რეგიონში სტიქიისგან მიყენებულმა ზარალმა 600 000 ლარს გადააჭარბა. სამხარეო ადმინისტრაციაში აცხადებენ, რომ ზარალის სრულად დათვლის შემდეგ გახდება ცნობილი, მას ადგილობრივი ბიუჯეტიდან დაფარავენ, თუ ცენტრალური ხელისუფლება აანაზღაურებს.

იმერეთის რეგიონში, რამდენიმედღიანი ძლიერი წვიმების შედეგად, მხარეში შემავალ მუნიციპალიტეტებს პრობლემები შეექმნათ. ძლიერი წვიმის გამო მდინარე რიონი ადიდდა და კალაპოტიდან გადმოვიდა. უამინდობის გამო წყალტუბოს მუნიციპალიტეტის სოფელი ჟონეთი დაიტბორა. ჩაკეტილი იყო ქუთაისი-ალპანა-მამისონის საავტომობილო გზის მონაკვეთი.

გარემოს ეროვნული სააგენტოს ინფორმაციით, ნალექიანი ამინდი კვირის ბოლომდე გაგრძელდება. სინოპტიკოსების ცნობით, ძლიერი წვიმების გამო საქართველოს დიდ და საშუალო მდინარეებზე შესაძლებელია წყლის დონის მატება.