ევროპული სამეზობლო პოლიტიკის და გაწევრიანების თაობაზე მოლაპარაკებების საკითხებში ევროკომისარი საქართველოს პრეზიდენტს ხვდება. იოჰანეს ჰანი და გიორგი მარგველაშვილი საქართველოს ოკუპირებულ ტერიტორიებზე არსებულ ვითარებას და კონსტიტუციის ცვლილებების პროექტს განიხილავენ.

„საქართველო შეიძლება გახდეს ის ადგილი, სადაც ევროკავშირი დაგეგმავს სხვადასხვა აქტივობასა და ინიციატივას. მე ასევე შევხვდები ოპოზიციის წარმომადგენლებსაც და ვისაუბრებთ ქვეყნის განვითარების პროცესზე. საქართველოს მოქალაქეები უკვე იყენებენ უვიზო მიმოსვლას, ვნახოთ კიდევ რისი გაკეთება შეგვიძლია" , - განაცხადა ჰანიმ.

ევროკომისარი უკვე შეხვდა პრემიერს და საგარეო საქმეთა მინისტრს. გიორგი კვირიკაშვილმა და ევროკომისარმა, იოჰანეს ჰანმა შეხვედრის შემდეგ განაცხადეს,რომ 2018 წლის შემოდგომაზე საქართველოში ევროპული სკოლა გაიხსნება, რომელიც მსურველებს ევროპული სტანდარტების განათლებას შესთავაზებს.