„არც სამშობლო, არც ბატონი", „არც მაკრონი, არც ლე პენი" -ამ ლოზუნგებით საფრანგეთში სკოლის მოსწავლეები საპროტესტო აქციებს მართავენ. პარიზის 20-მდე ლიცეუმის მოსწავლეები საფრანგეთის საპრეზიდენტო არჩევნების მეორე ტურში გასული კანდიდატების, მარინ ლე პენის და ემანუელ მაკრონის წინააღმდეგ გამოვიდნენ. ამის შესახებ სააგენტო „reuters"-ი იუწყება.

დემონსტრანტებსა და პოლიციას შორის შეტაკებაც მოხდა.ფრანგულ მედიაში გავრცელდა ინფორმაცია, რომ პოლიციამ აქციის დასაშლელად ცრემლსადენი გაზი გამოიყენა. სკოლის მოსწავლეები კი სამართალდამცველების მისამართით ქვებს და ბოთლებს ისროდნენ.

როგორც სააგენტო „ფრანს პრესი" პარიზის სკოლების სამმართველოზე დაყრდნობით იუწყება, საპროტესტო აქციის გამო, დღეს ოთხმა ლიცეუმმა სასწავლო პროცესი შეწყვიტა, ექვსი ლიცეუმი კი ნაწილობრივ არის ბლოკირებული.