ფხენიანში თვლიან, რომ კორეის ნახევარკუნძულზე დამრტყმელი ძალის გაგზავნა აშშ-ის აგრესიულ მიზნებს ამტკიცებს. ქვეყნის საგარეო საქმეთა სამინისტროს ცნობით, ატომური ავიამზიდის „კარლ ვინსონის" ნახევარკუნძულის სანაპიროებთან გაგზავნა მიუთითებს, რომ აშშ-ის სცენარი ჩრდილოეთ კორეაში შეჭრასთან დაკავშირებით, სერიოზულ ფაზაში გადავიდა.

„თუ აშშ სამხედრო არჩევანი გააკეთა, ჩვენ მზად ვართ ამ პროვოკაციას იმავე ფორმით ვუპასუხოთ", - განაცხადეს ჩრდილოეთ კორეის საგარეო საქმეთა სამინისტროში.

განცხადებაში ასევე ნათქვამია, რომ ჩრდილოეთ კორეა მშვიდობის უზრუნველყოფას არავის სთხოვს და მზადაა საკუთარი თავი იარაღის გამოყენებით დაიცვას.

შეერთებულმა შტატებმა კორეის სანაპიროსკენ სამხედრო ხომალდების ჯგუფი 9 აპრილს გაგზავნა. აშშ-ის სამხედრო-საზღვაო ძალების დამრტყმელი ძალა, წყნარი ოკეანის დასავლეთის მიმართულებით გაემართა. ფლოტის შემადგენლობაში ატომური ავიამზიდი „Carl Vinson"-ი, ორი კრეისერი და მართვადი რაკეტებით აღჭურვილი ორი გამანადგურებელიც შედის.