რუსეთის სახელმწიფოს სათათბირო კომიტეტმა დაამტკიცა კანონპროექტი, რომლის მიხედვითაც რუსული ენის მცოდნე პირებს მოქალაქეობის მიღება გაუადვილდებათ.

რუსეთის დუმაში წარდგენილი კანონპროექტის თანახმად, ყოფილ სსრკ-ში დაბადებულ ყველა ადამიანს და მათ შთამომავლებს რუსული პასპორტის გამარტივებული წესით აღება შეეძლებათ.

კანონპროექტი რუსეთის სათათბიროს დსთ-ის საქმეთა კომიტეტის თავმჯდომარის პირველმა მოადგილემ, კონსტანტინ ზატულინმა წარადგინა. მისი ერთ-ერთი ავტორი, ნატალია პოკლონსკაიაა.

დოკუმენტი „რუსეთის ფედერაციის მოქალაქეობის შესახებ" და „უცხოელ მოქალაქეთა სამართლებრივი სტატუსის შესახებ" კანონებში ცვლილებების შეტანას ითვალისწინებს.

განმარტებით ბარათში აღნიშნულია, რომ აღნიშნული საკითხი რუსეთის პრეზიდენტ ვლადიმერ პუტინის თხოვნით განვითარდება.