რუსთავში, კულტურისა და დასვენების პარკის მიმდებარედ, ქვის გადამამუშავებელ საამქროში გამთენიისას გაჩენილ ხანძარს, მსხვერპლი მოჰყვა. გარდაცვლილი 23 წლის ახალგაზრდა მამაკაცია. რუსთავის მერიის ინფორმაციით, ხანძარი მუშების მოსასვენებელ ერთ-ერთ ოთახში გაჩნდა. ხანძრის გამომწვევი მიზეზი ამ დროისთვის უცნობია.

ადგილზე 2 სახანძრო მანქანა მუშაობდა და ცეცხლის ჩაქრობა სწრაფად მოახერხეს, შემდეგ კი ჯიხურში გარდაცვლილი მამაკაცის ცხედარი აღმოაჩინეს.

ადგილზე ექსპერტ-კრიმინალისტები მუშაობენ. გამოძიება სისხლის სამართლის კოდექსის 187-ე მუხლით მიმდინარეობს, რაც ნივთის დაზიანებას ან განადგურებას გულისხმობს, რამაც ადამიანის სიცოცხლის მოსპობა გამოიწვია.