საკონსტიტუციო კომისიამ ე. წ. სტრასბურგის მოდელის შექმნის ინიციატივაზე უარი განაცხადა. გუშინ, კომისიის სხდომის დასრულების შემდეგ აღნიშნულის შესახებ განცხადება კონსტიტუციონალისტმა, ვახუშტი მენაბდემ, გააკეთა. მისი თქმით, იყო ინიციატივა, რომლის მიხედვითაც საკონსტიტუციო სასამართლოს უნდა მისცემოდა რეალური კონტროლის შესაძლებლობა ანუ საერთო სასამართლოების საბოლოო გადაწყვეტილებების კონსტიტუციური კონტროლის კომპეტენცია.

„სამწუხაროდ, ეს საკითხი უარყოფილია და კომისიამ მიიღო გადაწყვეტილება, რომლის მიხედვითაც საკონსტიტუციო სასამართლოს ეს უფლება არ მიენიჭება", - განაცხადა ვახუშტი მენაბდემ.