სახელმწიფო საკონსტიტუციო კომისიის სამუშაო ჯგუფის დღევანდელ შეხვედრაზე მსჯელობა ძირითადად პარლამენტის ადგილსამყოფელთან დაკავშირებით წარიმართა. ამასთან, კომისიის ფარგლებში გამოითქვა მოსაზრება იმის თაობაზე, რომ ყველა კონსტიტუციური ორგანო იყოს დედაქალაქში და ეს თავად კონსტიტუციით განისაზღვროს. სავარაუდოდ, საქართველოს კონსტიტუციიდან იმ მუხლს ამოიღებენ, რომელიც პარლამენტის ადგილსამყოფელად ქალაქ ქუთაისს გაანსაზღვრავს.

"კომისიის ერთი წევრის გარდა, ძალიან დიდი უმრავლესობა აყენებდა საკითხს, რომ პარლამენტის ადგილმდებარეობად განისაზღვროს თბილისი. აღნიშნულ საკითხზე იქნება ცხარე კამათი, მსჯელობა. ჩემი პირადი მოსაზრებაა, რომ კონსტიტუციით არ იყოს განსაზღვრული პარლამენტის ადგილსამყოფელი და მოხდეს შესაბამისი მუხლის კონსტიტუციიდან ამოღება", - აცხადებს მამუკა მდინარაძე.