დავით საგანელიძისა და ზაქარია ქუცნაშვილის დაპირისპირების შემდეგ ფრაქცია "ქართული ოცნების" შიგნით კიდევ ერთი დაპირისპირებაა. დეპუტატი ელისო ჩაფიძე "რეზონანსთან" საუბრისას ამბობს, რომ დაპირისპირება ირაკლი ტრიპოლსკისთან აქვს.

ჩაფიძის თქმით, დაპირისპირება გამოიწვია იმან, რომ მის წინააღმდეგ გარკვეულ პროვოკაციებს აწყობენ - ტყიბულელებს ცრუ ინფორმაციას აწოდებს განათლების მინისტრის მრჩეველი ოთარ აბესაძე, რომელიც ტყიბულის საზოგადოებას დეპუტატმა ტრიპოლსკიმ წარუდგინა და მუდმივად ტყიბულში იმყოფება.

"რეზონანსი": რა ვითარებაა ფრაქციაში? ფრაქციის შიგნით არსებული დაპირისპირება თუ აზრთა სხვადასხვაობა ამოწურულია? საგანელიძე და ქუცნაშვილი შერიგდნენ?

ელისო ჩაფიძე: საქმიან ჭრილში ისინი ყოველთვის ურთიერთობდნენ და ახლაც ურთიერთობენ. პიროვნულ ფაქტორებს რაც შეეხება, ამაზე კომენტარის კეთებას არ ვაპირებ. ეს მათი პირადი საქმეა და თვითონ ისაუბრონ. არავითარი დაპირისპირება არ ყოფილა. ეს იყო პრინციპთან დაკავშირებული აზრთა სხვადასხვაობა.

"რ": გავრცელდა ცნობა, თითქოს თამარ კორძაიას ფრაქციას დაატოვებინებენ, თქვენ თუ ხართ ინფორმირებული, რამე კულუარული საუბარი ხომ არ ყოფილა ამის შესახებ ფრაქციის შიგნით?

ე.ჩ: ამაზე ის ინფორმაცია მაქვს მეც, რაც თქვენ. ფრაქციის შიგნით ამ საკითხის სერიოზული განხილვა ნამდვილად არ ყოფილა. მოსაზრებების გამოთქმის უფლება ყველა ადამიანს აქვს, მაგრამ ფრაქციაზე ეს საკითხი არ განგვიხილავს.

"რ": ვადამდელი საპარლამენტო არჩევნების დანიშვნის შესახებ რა ინფორმაცია გაქვთ?

ე.ჩ: ვადამდელ არჩევნებს სჭირდება კონსტიტუციური საფუძვლები. ბიუჯეტის ჩაგდება, ან მთავრობის დამტკიცების საკითხი, რომელიც პარლამენტმა სამჯერ უნდა ჩააგდოს. არცერთი ამის ნიშანი არ ჩანს.

მეორე მხრივ პარლამენტის მიმართ აგრესიული დამოკიდებულება გახშირდა. არიან პოლიტიკური ძალები, რომლებსაც პარლამენტში მოხვედრა ეჩქარებათ, მაგრამ მე მათ ვურჩევ, რომ 2016 წლის არჩევნებისთვის მოემზადონ ისე, რომ ამომრჩეველმა მათგან მკაფიო მესიჯები მიიღონ. არჩევნებს სახელმწიფოს მხრიდან ფინანსური ხარჯების გაწევა დასჭირდება, რაც ამ ეკონომიკური კრიზისის ფონზე ირაციონალური იქნება.

"რ": ელოდებით თუ არა, რომ მომავალ არჩევნებზე "ქართულ ოცნებაში" მნიშვნელოვანი გადაადგილება იქნება?

ე.ჩ: ეს ჩვეულებრივი პროცესია. ყველა პარტიაში მოხდება ცვლილებები. პოლიტიკური ფიგურების რეიტინგებს აქვს მნიშვნელობა, რომ რაციონალურად დაიგეგმოს, თუ სად იქნება მომგებიანი ესა თუ ის კანდიდატი და იქნება თუ არა საერთოდ.

"რ": საგანელიძემ თქვა, რომ ამ უმრავლესობის ბევრი წევრი შემდეგი არჩევნების პარტიულ სიაში აღარ იქნებაო...

ე.ჩ: მე არ მაქვს ამაზე ინფორმაცია. ჩემს ყველა კოლეგას დიდ პატივს ვცემ და მიმაჩნია, რომ ამ ადამიანების რესურსი ბოლომდე არ არის გამოყენებული. მათ კონკრეტულ სფეროებში ძალიან სერიოზული ნაბიჯის გადადგმა შეუძლიათ. ახალი სახეების შემომატება და ახალი სისხლია საჭირო, ეს ნორმალური პროცესია, რასაც მეც მივესალმები.

"რ": თქვენ თუ იქნებით ტყიბულის მაჟორიტარობის კანდიდატი მომდევნო საპარლამენტო არჩევნებზეც?

ე.ჩ: მე არც 2012 წელს მითქვამს, რომ ტყიბულის მაჟორიტარობის კანდიდატი ვიქნები-მეთქი. ძალიან ბევრი ადამიანი, რომელიც ახლა ამაზე ოცნებობს, მაშინ ტყიბულში გავლა-გამოვლასაც კი ვერ გაბედავდა.

"რ": ვინ ოცნებობს ტყიბულის მაჟორიტარობაზე?

ე.ჩ: ამაზე ვერ გიპასუხებთ. ასევე ვერ გაგცემთ ვერც იმ კითხვაზე პასუხს, ვიქნები თუ არა ტყიბულის მაჟორიტარობის კანდიდატი.

"რ": გავრცელდა ცნობა, თითქოს თქვენ და ირაკლი ტრიპოლსკის ამ საკითხზე უთანხმოება მოგივიდათ. ადასტურებთ ამას?

ე.ჩ: ეს არ ეხებოდა ტყიბულის მაჟორიტარობის საკითხს. ეს იყო გარკვეულ პარტიულ ვიზიტზე, რომელიც ტყიბულის რაიონში იყო დაგეგმილი. იქ გარკვეულ პროვოკაციას ნამდვილად ჰქონდა ადგილი.

მე დღემდე მაინტერესებს, განათლების მინისტრის მრჩეველ ოთარ აბესაძეს სხვა საქმე არაფერი აქვს, რომ ტყიბულში იმყოფებოდეს და პროვოკაციებს აწყობდეს?! საკმაოდ ბევრს ატყუებს, ტყიბულელებს აწოდებს ცრუ ინფორმაციას მთავრობის მიერ გაწეულ სამუშაოებთან დაკავშირებით. მე ხალხის არჩეული ვარ და უნდა მომეცეს ჩემი უფლებამოსილების განხორციელების საშუალება.

"რ": ტრიპოლსკი რა შუაშია?

ე.ჩ: ოთარ აბესაძე ტყიბულის საზოგადოებას ირაკლი ტრიპოლსკიმ წარუდგინა, აბესაძე მას მამას ეძახის. 2012 წელს აქციაზეც კი არ მინახავს ეს ადამიანები გამოსული. დღეს რა როლს თამაშობენ და რა ფუნქციას ასრულებენ, ეს მართლა ძალიან მაინტერესებს.

მაქვს ინფორმაცია, რომ მათი მხრიდან პროვოკაციებია დაგეგმილი ჩემ წინააღმდეგ და ასევე ადგილობრივი საკრებულოს წინააღმდეგაც აქვთ დაგეგმილი პროვოკაციები. ეს ძალა დამშვიდებულ რაიონში ცდილობს, წყალი აურიოს, მღვრიე წყალში თევზებს ვინც იჭერს, ეს ძალიან კარგად იცით. შესაძლოა, გადავდგა ნაბიჯი და მოსლოდნელ პროვოკაციაზე წინასწარ ვისაუბრო.

"რ": კომიტეტის თავმჯდომარეების კანდიდატურების შესახებ რა ინფორმაციას ფლობთ. განიხილება თუ არა ევროპასთან ინტეგრაციის კომიტეტის პოსტზე თინა ხიდაშელის კანდიდატურა?

ე.ჩ: ამ თემაზე ვერაფერს კონკრეტულს ვერ გეტყვით. ამ თანამდებობებზე ბევრი კანდიდატურა განიხილება, მაგრამ გვარებს ჯერ ვერ დაგისახელებთ. შაბათს პოლიტსაბჭოს სხდომაზე მიიღებენ გადაწყვეტილებას და ჩვენ ამის მიხედვით ვიმსჯელებთ.

"რ": პარლამენტის თავმჯდომარის აშშ-ში ვიზიტს როგორ შეაფასებთ, რა გზავნილები დაინახეთ დავით უსუფაშვილის გამოსვლაში?

ე.ჩ: დიდი იმედი მაქვს, რომ უსუფაშვილის ვიზიტი კონკრეტულ შედეგებს მოიტანს, იმიტომ, რომ ჩვენს სტრატეგიულ პარტნიორებთან მუდმივი კომუნიკაცია მართლაც მნიშვნელოვანია. პარლამენტის თავმჯდომარემ განაცხადა, რომ ის აშშ-დან იმედიანად ბრუნდება, რაც იმას ნიშნავს, რომ ჩვენ მიმართ აშშ-ს მხარდაჭერა გაძლიერდება, რაც ძალიან მნიშვნელოვანია. მითუფრო იმ ფონზე, რაც აქვს ჩვენს ქვეყანას.

უსუფაშვილს შეხვედრა ჰქონდა საგარეო კომიტეტში, ასევე არასამთავრობოებში და ე.წ. აზრის შემქმნელ ინსტიტუტებში. ის ხვდება ადამიანებს, რომლებიც იღებენ გადაწყვეტილებებს, ქმნიან საზოგადოებრივ აზრს.

ამერიკაში სისტემა სხვანაირად მუშაობს, პოლიტიკოსები და პირველი პირები იმ გადაწყვეტილებას იღებენ, რისთვისაც ეს სექტორია მომზადებული. აქედან გამომდინარე, მისი შეხვედრები ძალიან მნიშვნელოვანი იქნება ჩვენი ქვეყნისთვის.

"რ": საფრანგეთის პრეზიდენტმა ფრანსუა ოლანდმა განაცხადა, რომ ნატოს გაფართოება არ იგეგმება, ეს ნიშნავს, რომ ნატოში ინტეგრაციას ახლო მომავალში არ უნდა ველოდოთ?

ე.ჩ: ფრანსუა ოლანდის დიდი პატივისცემის მიუხედავად, ის არ განსაზღვრავს მსოფლიო პოლიტიკას ამ საკითხებთან მიმართებაში. შესაბამისად, ამ განცხადებას მე ძალიან ტრაგიკულად არ შევხედავდი. განიმარტა ამ განცხადების შემდეგ, რომ გადაწყვეტილებებს იღებენ სისტემები, სტრუქტურები და არა კონკრეტული პირები.

ჩვენ ვიცით, რომ ძალიან ბევრი ქვეყანაა სკეპტიკურად განწყობილი საქართველოს წევრობასთან დაკავშირებით, მაგრამ ეს არ გახლავთ განაჩენი. არც იმის ილუზია უნდა შევიქმნათ, რომ ეს ყველაფერი ხვალ და ზეგ მოხდება, მაგრამ თანამშრომლობა ნატოსთან გაგრძელდება. ეს არ იქნება არცერთი ქვეყნის წინააღმდეგ და ეს საშუალებას მოგვცემს, რომ მომავალში ვიყოთ საერთაშორისო უსაფრთხოების ქოლგის ქვეშ.

"რ": თუმცა ამ სკეპტიკოს ქვეყნებს აქვთ ვეტოს უფლება. ამის გამო არ მოგვცეს მაპი...

ე.ჩ: ძალიან ბევრი ქვეყანა იყო ასეთი, მათ შორის ჯერ კიდევ 2008 წლის აგვისტოს ომის შემდეგ. ჩვენ უნდა გავაგრძელოთ პარტნიორობა და თანამშრომლობა. იმედი მაქვს, რუსეთი დარწმუნდება, ეს არ არის მის წინააღმდეგ მიმართული ქმედება.

"რ": ხელისუფლება ნატოს კარზე კაკუნის პოლიტიკას გააგრძელებს?

ე.ჩ: რა თქმა უნდა. რაც დრო გავა, ეს კაკუნი იქნება უფრო აქტიური და ძლიერი.

ბრალდებების მიუხედავად, დარწმუნებით შემიძლია გითხრათ, ევროსტრუქტურებთან დაახლოების კუთხით ამხელა ნაბიჯები საქართველოს არასოდეს არ გადაუდგამს. ამ კურსს არავითარი საფრთხე არ ემუქრება.