თუკი სასამართლოს გადაწყვეტილებას ვინმე არ ეთანხმება, შეუძლიათ გაასაჩივრონ - ამის შესახებ იუსტიციის მინისტრმა გიორგი რურუას საქმესთან დაკავშირებით განაცხადა.
თეა წულუკიანის თქმით, დღეს საქართველოში სასამართლო სისტემა დამოუკიდებელია და არასასურველი განაჩენი ორივე მხარეს შეუძლია სხვა ინსტანციის სასამართლოში გაასაჩივროს.
„დღეს ჩვენ ყველამ მედიის დახმარებით, ვნახეთ ის განაჩენი, რომელიც გამოქვეყნდა სასამართლოს მიერ რურუას საქმეზე. თუკი თავად ბატონ რურუას, მისი ადვოკატების მხრიდან, ან პროკურატურის მხრიდან, რომელიც მხარეა ასევე ამ საქმეში, აქვს რაიმე წუხილი მოცემულ განაჩენთან დაკავშირებით, ჩვენს ქვეყანაში დღეს არსებობს თავისუფალ პირობებში, პოლიტიკური წნეხისგან თავისუფალი, აღმასრულებელი ხელისუფლებისგან, იუსტიციის მინისტრისგან, კანონმდებლებისგან თავისუფალი სასამართლო, მათ შორის, სააპელაციო და საკასაციო ინსტანციები, სადაც ორივე მხარეს შეუძლია გაასაჩივროს მისთვის არასასურველი განაჩენი, ან ამ განაჩენის რომელიმე ნაწილი, თუ ისინი მას არ ეთანხმებიან“, - განაცხადა თეა წულუკიანმა.