მაღალი ეპიდემიოლოგიური რისკის მიუხედავად გარდაბანი ჯერჯერობით არ ჩაიკეტა. რეგიონში არსებულ მდგომარეობაზე საკოორდინაციო საბჭომ იმსჯელა და გადაწყდა, რომ მუნიციპალიტეტში ეპიდსიტუაციის მართვას სპეციალისტები ფართომასშტაბიანი თერმოსკრინინგით და გაფართოებული ტესტირებით შეეცდებიან. კორონავირუსით ინფიცირების ყველაზე მეტი შემთხვევა ახლა სწორედ გარდაბანში ფიქსირდება. ეპიდემიოლოგები რეგიონში რამდენიმე კლასტერზეც საუბრობენ.

24 ინფიცირებულიდან 14 ყარაჯალარშია, რომლის მოსახლეობა, დაახლოებით, 4 ათასს შეადგენს. მაღალი რისკის გათვალისწინებით და ეპიდ. ვითარების კონტროლის ეფექტიანი მართვისთვის სოფელში მოსახლეობის გაფართოებული კვლევები ეპიდემიოლოგების 6 ჯგუფმა დილიდან დაიწყო.