სამშობიარო დაწესებულებებისთვის რეგულაციების ნაწილი მოიხსნა. კერძოდ, მიმდინარე წლის იანვარში ამოქმედებული რეგულაციის თანახმად, სამშობიაროებში მომუშავე ექიმ-სპეციალისტებს უფლება აქვთ, დასაქმებული იყვნენ დამატებით სამედიცინო მომსახურების მიმწოდებელ მხოლოდ ორ დაწესებულებაში, მაქსიმუმ 60 კმ-ის დაშორებით. ჯანდაცვის სამინისტროს ახალი ბრძანებით კი, ეს შეზღუდვა არ ვრცელდება ექიმ-სპეციალისტების შემდეგ ნაწილზე: გენეტიკოსი, ბავშვთა ფთიზიატრი-პულმონოლოგი, ბავშვთა ენდოკრინოლოგი, ბავშვთა ნეფროლოგი, ბავშვთა უროლოგი.
როგორც საქართველოს პირველ არხთან საუბარში ჯანდაცვის მინისტრის პირველი მოადგილე თამარ გაბუნია განმარტავს, აღნიშნული რეგულაცია და, შესაბამისად, ცვლილება შეეხება მესამე დონის სამშობიაროებს, ანუ დაწესებულებებს, რომლებსაც მშობიარის ყველა სახის გართულების მართვა და სპეციალიზებული, კომპლექსური სამედიცინო მომსახურების გაწევა შეუძლია.